مساء بديع

النيل .. و مراكبه و صيادينه و السمك جواه

ماشيين جمبي من يجي ساعه و اكتر

وما تعبوش

الجو جميل و السما مليانه نجوم

من زمان ما شفتش نجوم بتبرق في السما

استعجبت لما رفعت راسي لفوق فلقيتهم بيطنططوا فوقي و حواليا

بيرقصوا و يغنوا

دول كمان بيرسموا

بيرسموا قلوب واسعه و براح .. ملهاش حيطان

قلوب طراوه .. شبه كبايه عصير لمون غرقانه مكعبات التلج فيها

كل خمس نجمات صغنتطين ماسكين ايدين بعض و بيلعبوا ..

فتحي يا وررررده ... قفلي يا وررررده

فتحي يا وررررده ... قفلي يا وررررده

لما الورده تفتح بيتبعتروا بعييييييييييد

عند اخر الدنيا .. او ابعد قليلا

لما الورده بتقفل .. بيضموا قلبهم علي قلب بعض جامد

فما تعرفش تشوفهم غير نجمايه واحده بس بتلمع زياده شويه ..

سألت نفسي !؟

هي القاهره امست اقل تلوثا ؟؟؟ و لا السما عملالي حفله خصوصي ؟؟؟