Saturday, May 05, 2007

عين الحسود فيها عود

الفاتحة للنبي و أحباب النبي و أزواج النبي و أنصار النبي , و عثمان و علي و العاشق في جمال النبي , يصلي عليه
كعبة الله المشرفة و بيت الله السعيد , طلقنا البخور و صلوا علي بهي النور, يا جابر كل مكسور
بالله يا سيدي تاخد بايدي و حياه النبي الهادي
أنا دخيلة علي عروس القيامة محمد , تاخدوا الدخان و تدوه البرهان, و تردوه زي ما كان
جسمها ما تئــذوه , نومها ما ترعــبوه , اللي منكم ترفــعوه , و قلبها تسيبوه
عاشقة في النبي , صلوا عليه , الفاتحة لماد و يزات , و عويشه الله و زوينب
علي اسياد ستات
ولالي حجات كلمة التوحيد
الأولي بسم الله , و التانيه بسم الله, و التالته بسم الله
و الرابعه بسم الله , و الخامسه بسم الله , و السادسه بسم الله
و السابعه بسم الله , و قوه محمد بن عبد الله
النبي رأي ناقته من عين جماعته
حط لها العليق ما داقته .. كانت كسير , بأذن الله تسير
وقلت لها يا عين يا عين .. ما فيكيش منافع للناس
و احطــك يا عين .. في قمقم من نحـــاس
و اسبك عليكي يا عين .. الزئبـق و الرصاص
و ارميك يا عين .. في بـحر الغطــاس
قالت و النبي خدي علي عهد الله
لا أخون بنت في قمرتها .. و لا عروس في جلوتها
ولا جاموسه في ضرتها.. و لا مره في دارها .. ولا راجل في دكانه

رأيتك من عين المره .. أحدّ من الشرشرة
و من عين الراجل .. أحدّ من المناجل
و من عين البنت .. أحدّ من الخشت
و من عين الولد .. خرقتي الزرد
ومن عين الفقي .. خرقت البندقي
ومن عين الجاريه .. أحدّ من السيوف الحاميه
و من عين العبيد .. زي ضرب الكرابيج
و من عين الضيف .. أحدّ من السيف
و من عين الجاره الحاسده المكاره
و من عين اللي شافوكي و اللي نظروكي .. قروب و غروب
لا صلي عليهم و لا علي والديهم
عنيهم مردوده عليهم
و القبة عنك تفترق
طيري يا عين كما طارت الريشة و انشقي يا عين كما انشقت الحشيشة
و ابردي يا عين

الأدب الشعبي
احمد رشدي صالح

16 Comments:

Blogger Mohamed A. Ghaffar said...

أدب جميل ولكنه منافى للعقيده

1:31 AM  
Anonymous Anonymous said...

:)
هما الفراشات كمان بيتحسدوا؟
لذيذة
بس ممكن نقرا قرآن وربنا يسترها معانا بدل الحركات الجامدة دى
ربنا يكرمك
هناء

2:13 AM  
Blogger cigara... said...

هههههههههههههه
هههههههههههه
ههههههههههههههههه
ههههههههههههههههههههه
هههههههههههههههههه
ههههههههههههههه
هههههههههههههههههههه
هههههههههههههههههه
ههههههههههههههههه
ههههههههههههههههههه
هههههههههههههههههههههه

3:09 AM  
Blogger Té la mà Maria said...

irreverent e iconoclast

http://telamamaria.blogspot.com

Thank

6:50 AM  
Blogger Bassma said...

ا/محمد عبد الغفار سيدي الفاضل العقيدة علي عيني و راسي بس الادب و الفنون الاخري ما بيتحكمش عليه غير من منظور فني بحت ..هكذا تعلمنا
فراشتي الجميله .. ايوه طبعا الفراشات بيتحسدوا .. بل هم لفرط رقتهم و جمالهم العين دايما رصداهم في الرايحه و الجايه .. و بعدين يا جميلتي ده مجرد نص يعني ما تكونيش قلقانه مش هجيب الديك ابو عرف ازرق و اروح الزار ..لالا .. لسه شويه علي ما اوصل المرحله دي
سيجاره.. ربنا يبسطك كمان و كمان :)

8:42 AM  
Blogger ibn_abdel_aziz said...

ربنا يباركلكوا يا جماعة
لعلمكوا انا فصلت خالص من ساعة فرح عمرو ورضوي

انتو اتخطبتوا بس واللا اتجوزتوا؟
اوعي تكونوا اتجوزتوا وانا مش عارف

2:58 AM  
Blogger david santos said...

It places fhoto of Madeleine in your bloggue


Missing Madeleine!
Madeleine, MeCann was abduted from Praia da Luz, Portugal on 03/03/07.

If you have any information about her whereabouts, please contact Crimestoppers on 0800555111 Please Help

1:35 PM  
Blogger Bassma said...

ابن عبد العزيز .. ربنا يبارك فيك .. يا افندم احنا مخطوبين من يوم 14 / 2 / 2007
وما نقدرش نتجوز من غير علم حضرتك يا افندم و باقي اصدقاءنا المحترمين :)

شكرا جزيلا علي اهتمامك و يا رب تكون مبسوط دائما و راضي و انسان

10:06 PM  
Blogger 3asfortels7ab said...

والله تحفة ومش عارفه ايه المناقد فيها للعقيدة ده ببساطة شعور ديني جميل من ناس بسيطة بتعبر بكلامها الشعبي الجميل
تسلمي يا بسمة

10:21 AM  
Blogger يا مراكبي said...

موضوع ظريف على فكرة .. اللي كاتب الكلام ده عمل مجهود كبير علشان يجمع الجمل الشعبية دي كلها بالعدد ده كله

تحسي وكأنك جوه مولد من الموالد الشعبية فعلا

تحياتي

12:33 AM  
Blogger Bassma said...

عصفورة الصحاب .. مش كدة و النبي ؟ :)
مراكبي اللي عمل الموضوع ده باحث مهم جدا و كتابه " الادب الشعبي " يعد من اهم المراجع في هذا الموضوع .. اسعدني تعليقك

6:11 AM  
Blogger Aladdin said...

جميل جداً الواحد يلاقي لسه حد مهتم بالأدب الشعبي ... أنا مهتم بالأدب الشعبي والفلكلور منذ أكثر من 12 سنة (من أيام الجامعة).

للأسف الشديد أدبنا الشعبي يعاني من وضع شديد السوء لأنه مطروح بين سندان المعاصرة (اندثار الكثير من موروثنا الشعبي بسبب انتشار مظاهر المدنية) وسندان السلفية التي ترى في الأدب الشعبي مظهراً لـ"الانحراف" عن جادة الحق!!

كويس إنك نقلتي الأجزاء بتاعت "الحسود" ومانقلتيش "العديد"!!

2:15 PM  
Blogger Bassma said...

علاء الدين كلامك صحيح الي حد كبير اضف الي ذلك ان بعض المتأمركين يرون في التنصل من كل تراثي تمدين و عصريه..
اسعدني جدا تعليقك

8:21 AM  
Blogger نفسنا said...

تم أفتتاح العدد الأول من مجلة نفسنا
نتمنى منكم زيارتنا

9:23 AM  
Blogger meroooo said...

حلوه اوي واحلي حاجه اول الكلام الفاتحه
ربنا يوافقك

10:01 AM  
Blogger Bassma said...

شكرا علي الزيارة يا ميرو:)

11:31 PM  

Post a Comment

Links to this post:

Create a Link

<< Home